Aaj Aisa Kertay Hein..!!

Aaj Aisa Kertay Hein..!!


Be'sada lafzon main
wajeh-e-zindagi keh ker
wasl ki zaroorat per
phir se zor detay hein
Aaj aisa kertay hein
ziker wohi kertay hein
Naam aur detay hein

Zabt ke kinaro'n se
dard aan lipta hai
toot'tay kinaray abb
dard aur detay hein
Aaj aisa kertay hein
dard se ulajhtay hein
zabt chor detay hein

taar taar daman ko
khaar khaar raaho'n main
ranjishe'n bhula ke hum
aa ke jor detay hein
Aaj aisa kertay hein
Hum nahi palat'tay hein
raah mor detay hein...!!

sabz sabz mausam main
laal laal aankhon ke
khawab ki raggo'n se hum
khoo'n nichor detay hein
Aaj aisa kertay hein
ye bhi ker guzartay hein
khawab tor detay hein..!!

aa ke abb duao'n ko
maatmi ridao'n main
phir se ker ke alwidah
moqa aur detay hein
Aaj aisa kertay hein
daria main utartay hein
rabb pe chor detay hein!!