Mein maa hoon elm hai mujh ko

Mein maa hoon elm hai mujh ko,

Mera bacha,

Mujhay kab,kyun bulata hai,

Rulati hai ussay kia bat,kis pal muskarata hai?

Woh kab aaram karta hai,woh kese khilkhilata hai,

Mein maa hoon elm hai mujh ko,

Magar jab yeh bara ho ga,

Mujhay yeh kuch bataye ga,

Yeh kuch mujh sey chupaye ga,

Yeh samjhay ga k maa ko kia khabar is ki,

Woh ghar baithay bhala kia jaan paye gi?

Woh ghar takheer sey aa kar bahanay jab banaye ga,

Mein sab kuch jaan kar anjaan ban jaoon gi us lamhay,

Kah yeh har maa ki fitrat hai,

Mera bacha yeh kese jaan sakta hai,

Kah us ki in ragon mein,MAA lahu k sath chalti hai,

Usay kanta bhi chubh jaye tu maa ka dil tarapta hai,

Woh jis jah bhi chala jaye,

Duaon k ghanay has'sar mein mehfooz hota hai,

Woh maa k dil mein hota hai,

Qadam jis pal uthata hai,

Woh jis rastay pe jata hai,

Tu thandi chaon sa aanchal bhi us k sath hota hai,

Main MAA hoon elm hai mujh ko.....